Ang Department of Social Welfare and Development (DSWD) Field Office XI pinaagi sa National Household Targeting Office (NHTO), ug Pantawid Pamilyang Pilipino Program (4Ps), nagpahigayon sa unang hugna sa “Regional i-Registro ang F1KD sa 4Ps” sa Barangay Matina Crossing 74-A, karong adlawa, February 12, 2025. Ang maong aktibidad adunay target nga 50 ka benepisyaryong 4Ps sa maong barangay nga mabdos ug adunay anak nga nag edad 0-24 ka bulan (0-2 tuig sa pangedaron). 

Gilunsad ang i-Registro pinaagi sa usa ka oryentasyon alang sa mga benepisyaryo sa 4Ps mahitungod sa F1KD, nga gisundan sa detalyadong oryentasyon sa web portal nga i-Registro. Naghatag og mas paspas ug mas hamugaway nga paagi ang maong site sa pag-update sa impormasyon sa mga benepisyaryo sa Pantawid Pamilya Information System (PPIS). Maingong usa kini ka mahinungdanong lakang alang sa episyenteng pagpatuman sa F1KD cash grant sa 4Ps.

Human sa maong oryentasyon, gisundan kini sa usa ka house-to-house visitation, aron madoble ang paningkamot ug masiguro nga marehistro ang mga targeted beneficiaries sa lugar.

Sumala pa ni Cristina S. Jumawan, usa sa mga targeted alang sa F1KD nga benepisyaryong 4Ps, dakong importansya ang maong dugang nga cash grant sa iyang bagong himugso nga anak. Mapasalamaton sab siya sa i-Registro sa paspas nga transakyon niya. “Dali ra kaayo mag-update sa information pinaagi sa i-Registro. Para sa akoa nga bago lang nanganak, importante kaayo nga dili hasol ang pag update basta naa lang kay internet, cellphone, ug kumpleto ang imong requirements.”

Ang “i-Registro ang F1KD sa 4Ps” usa ka digital, self-service platform nga espesipikong gidisenyo alang sa mga aktibong benepisyaryo sa  4Ps nga mabdos, ug adunay anak nga nag edad 0-24 ka bulan. Ang giingong platfrom nagahatag og dali ug self-guided nga pinaagi sa pag update sa ilang mga profile pinaagi sa usa ka user-friendly nga web portal, alang sa pagsiguro sa hapsay nga implementasyon sa First 1,000 Days (F1KD) conditional cash grant program.

Alang sa mga benepisyaryo nga dili maka-avail sa digital nga mga rekisito, mahimo gihapon nga ma-update ang ilang mga impormasyon pinaagi sa Beneficiary Updating System Form 5 (BUS Form 5) uban sa tabang sa ilang assigned City/Municipal Links.

Kini usa sa paunang lakang sa NHTS aron sa mas pinadali nga pamaagi sa pag-update sa mga impormasyon sa mga benepisyaryong 4Ps. Magpadayon ang maong opisina sa paghatag og giya ug suporta alang sa pag-update sa profile sa i-Registro platform pinaagi sa 4Ps Family Development Sessions kon FDS nga ginahimo matag bulan.

Ang First 1000 Days (F1KD) cash grants nga ubos sa 4Ps mao ang dugang nga tabang pinansyal aron masuportahan ang mga benepisaryo nga adunay mabdos ug bata nga dili molapas sa duha ka tuig ang edad. Tumong niini nga matabangan ang mga importante nga galastuhon sa panglawas ug nutrisyon sulod sa una nga usa ka libo nga adlaw o First 1,000 Days (F1KD) nga gikonsidera nga pinaka-kritikal nga bahin sa kinabuhi sa usa ka bata. Naka-angkla kini sa Republic Act No. 11148, nga nailhan sab nga Kalusugan at Nutrisyon ng Mag-Nanay Act. Ang F1KD mao ang kontribusyon sa buhatan sa DSWD sa pagtubag ug pagpugong sa problema sa stunting sa mga batang nag edad 0-24 ka bulan. Kini usab aron matabangan ang pagpalambo sa panglantaw sa mga benepisyaryong 4Ps diha sa paghatag og bili sa hisgutanang kabahin sa panglawas. Kini nga grant, nagkantidad og P350.00 matag bulan, ug maghatag og mahinungdanong suporta sa mga kwalipikadong pamilya nga gisugdan na karong tuiga.

Giduso sa DSWD nga ang tanang aktibong 4Ps household-beneficiaries nga adunay mga anak nga nag-edad 0-24 ka bulan mugamit sa i-registro nga usa ka kombenyenteng online platform ug i-update ang ilang profile pinaagi sa https://iregistro-4ps.dswd.gov.ph/.

#BawatBuhayMahalagaSaDSWD