Sa padayong pagpaningkamot sa DSWD XI, pinaagi sa Pantawid Pamilyang Pilipino Program, ubay-ubay nga mga stratehiya ang gipalungtad sa buhaton aron masiguro nga makab-ot ang mga tumong ug tinguha sa programa sama sa paghanyag og dekalidad nga edukasyon labi na alang nadto sa mga batang 4Ps nga anaa sa mga Geographically Isolated and Disadvantaged Areas o GIDA.

Usa na sa maong stratehiya mao ang Enhanced Support Services Intervention kon ESSI diin, klase-klase’ng paghatud sa tabang ang ginahanyag niini ngadto sa mga marginalized nga komunidad sama na lang sa Indigenous Peoples Community sa Paquibato District, Davao City.

Maong sa bag-uhay lang, Enero 10, 2025, pormal na nga gi-turnover sa 4Ps ESSI ang proyekto niini nga usa ka makeshift dormitory alang sa mga estudyante Ata Manobo nga magtutungha sa Tapak National High School. Mikantidad og Php372,000 ang maong proyekto diin ang pinaka katuyuan ang pagpalambo sa kasamtangang kahimtang sa maong mga estudyante aron sila mabalik sa pagpokus sa pag-eskwela, maundang ang daghang pag-absent ug sayo nga pagpanarbaho o pagminyo.

Ang Tapak National High School ang nag-inusara nga tulunghaan alang sa mga kabataan sa Tapak, Paquibato District ug mga kasikbit sitio niini nga mao ang Sitio Gatungon, Sitio Baugan, Sitio Liguimit, Sitio Pigasuan, Sitio Paraiso, og Sitio Busay.

Tungod sa nag-inusara nga eskwelahan, ang mga estudyante gikan sa kasikbit nga mga sitio, mubaktas pa og pila ka oras aron lamang makasulod sa ilahang mga klase. Ang kawad-on sa regular ug luwas nga transportasyon usa sab sa mga hinungdan nga ang mga estudyante maulahi o usahay dili nagyud makasulod sa pag-eskwela. Kini sab miresulta sa taas nga rate sa Not Attending School (NAS) nga posibleng paingan ang Early Child Marriage ug Teenage Pregnancy.

Ang maong aktibidad, gipasiugdahan sa Davao City Operations Office 4Ps Provincial Link, Ruel A. Lagulao, ug gipartisiparan sab kini sa Tapak National High School Head, Arnel C. Saballa, Schools Division Superintendent-Davao City Division, Reynante A. Solitario, CESO V,  Public Schools District Supervisor- Cluster 13, Davao City Division, Bernabe M. Alicaya, Commander, 56IB, 7ID, PA, LTC ALI B. SUMANGIL INF (GSC), Talaingod, Davao del Norte, og Barangay Captain, Hon. Jocie M. Latawan.

Gilantaw nga ang maong dormitoryo nga proyekto sa ESSI, dako ang mahanyag nga tabang ug kabag-ohan sa komunidad sa mga IPs ug labi na sa pagdalit og paglaum alang sa mas mahayag nga kaugmaon sa mga Kabataang Ata Manobo.

Usa lamang ang ESSI sa daghang stratehiya sa DSWD aron dayong mabatukan ang kapobrehon sa nasud ug mahatagan og kalambuan ang pamuyo sa Pamilyang Pilipino.

#BawatBuhayMahalagaSaDSWD