Balut Island, Sarangani, Davao Occidental, 17 August 2023 – Nagpang apud-apod og cash assistance ang Department of Social Welfare and Development (DSWD) Field Office XI sa 31 ka mga family beneficiaries sa Balik Probinsya, Bagong Pag-asa (BP2) program, sa Sarangani, Davao Occidental, niadtong milabay nga Martes, 15 Agosto 2023.

Miabot ang mga empleyado sa DSWD XI sa usa sa mga pinakalayo nga lungsod sa Rehiyon XI, ang Sarangani sa Davao Occidental alang sa pagpang apud-apod og Transitory Family Support Package (TFSP) nga mikantidad og PHP 50,000 matag pamilya.

Ang TFSP mamahimong gamiton sa mga pamilya pagpalit og mga kinahanglanon sama sa grocery items, tambal, sinina, school supplies, ug uban pa. Mamahimo usab kining gamiton sa pagbayad sa kuryente ug tubig.

Ang mga benepisyaryo miuli sa Sarangani gikan General Santos City human mawad-an og panginabuhian, epekto sa pandemya ug uban pang risgo.

Gipangulohan ang maong aktibidad ni DSWD XI – BP2 Focal Lee Mecris Berdos kauban si Sarangani Municipal Mayor Adelan de Arce, Vice Mayor Marciano Lagudas, ug lain pa nga mga lokal nga opisyales ug empleyado sa DSWD XI.

Alang sa usa sa mga benipisyaryo sa BP2 TFSP nga si Jurita Kiramis, 57, lumulupyo sa Bgry. Tagen, dako iyang pagkamapasalamaton sa iyang nadawat nga ayuda. Dako kaayo kini nga tabang dili lang para niya, apan labi na para sa iyang bana ug apo nga adunay sakit.

“Dako kaayo ni nga tabang sa amoa nga mga nanginahanglan. Walay kasiguraduhan ang among pag-uli diri gikan GenSan kay wala gyud mi trabaho dinhi. Maong salamat kaayo sa DSWD ug sa Balik Probinsya program. Unta daghan pa inyong matabangan nga mga nanginahanglan sama namo.”

Ang Balik Probinsya, Bagong Pag-asa nga programa nagtinguha sa pagsulbad sa naghuot nga mga dakbayan sa Metro Manila ug lain pa nga highly-urbanized areas sa nasud, pinaagi sa pag-awhag sa mga tawo, ilabina sa mga informal settlers nga mobalik na sa ilang kaugalingong mga probinsya. Mopaluyo kanila niining maong transisyon ang suporta sa panggamhanan sama sa insentibo sa transportasyon, panginabuhian, balay, edukasyon, ug uban pa. ###