Ingon pa dili basta-basta ang kalig-on ug kadasig sa usa ka inahan. Mao kini ang panglantaw ug pamatasang gibaton sa usa ka 4Ps grantee nga 49 anyos, sari-sari store owner ug residente sa Davao City nga si Rosalia Salcedo.

Luyo sa tumang mga pagsulay, nagpadayon siya sa pagdamgo nga makahaw-as ang iyang pamilya ug komunidad sa kalisdanan ug kapobrehon, uban ang tabang sa gobyerno sama sa Pantawid Pamilyang Pilipino Program (4Ps) ubos sa DSWD.

“Dili mi makakaon og tarong, usahay ka duha sa usa ka adlaw lang mi maka kaon kung naay halin ang akong bana,” pipila sa mga pulong nga gipaambit ni Rosalia nga naghulagway sa kapit-os nga ilahang gisinati kaniadto bag-o pa sila nahimong benepisyaryo sa 4Ps.

Kaniadto, tungod kay gagmay pa lamang ang upat ka mga anak ni Rosalia, nagsalig lamang sila sa income sa iyahang bana nga usa ka construction worker.

Dili lang sab ang pamilya ni Rosalia ang misinati sa maong kalisud tungod, saksi sab siya sa iyahang mga kasilinganan, diin ang mga gagmay’ng bata sab nila namalimos na sa kadalanan.

Sa panglantaw nga gikinahanglan ang kabag-ohan sa iyahang kaugalingong pamilya ug sa tibuok komunidad, nagpabiliin si Rosalia nga malamuon. Diin, sa ginagmay nga paningkamot, ginagmay nga kadaugan sab ang iyahang makab-ot. Sama na lang sa paninguha nga makakaon na sila katulo ka beses sa usa ka adlaw sa iyahang pamilya ug mahuman sa pag-eskwela ang iyahang mga anak.

Apan, usahay aduna gihapon siya’y kahuyang diin ang kakapoy mupahuna-huna kaniya nga muundang sa pagpaningkamot. Ug sa panahong ginabati na niya kini, ang pagsampit sa labaw nga makagagahom lamang ang iyahang solusyon.

“In God nothing is impossible,” linya nga nahimo na niyang motto aron mubalik sa pagpanglimbasog aron makab-ot ang iyahang mga pangandoy.

Sa hugot niya nga pagtuo sa Diyos, miabot na gyud ang panahon diin siya ug ang pipila pa ka mga pamilya nakaangkon og tabang sa gobyerno paagi sa Pantawid Pamilyang Pilipino Program kon 4Ps.

“Para sa akoa, dako kaayo ang natabang sa 4Ps sa pagkab-ot sa akong tinguha o damgo para sa akong pamilya ug sa komunidad,” matud niya. 

Sukad nahimong benepisyaryo ang pamilya ni Rosalia, nahatagan siya og higayon aron maka-save sa income nila nga magtiayon. Tungod niini, nakapatukod na sab siya og gamay niya nga tindahan.

Aduna sab saktong paglamdag nga naangkon isip ginikanan ang mag-asawa gikan sa Family Development Sessions kon FDS sa 4Ps. Mas nahimo na silang confident ug mas nahibalo kung paunsa padakoon ug giyahan og tarong ang ilang mga anak. Tungod niini nga mga pagtulun-an, nahimong mas lig-on ang relasyon nila mag-asawa ug magpamilya.

Aduna sab nabatunang skills o kahibalo si Rosalia paagi sa pagsalmot og training nga gihanyag sa 4Ps ug sa partner niini. Apil sa mga nakat-unan niya mao ang perfume making, diin nahatagan pa siya og higayon nga makaangkon og dungag nga income.

Gawas sa kalambuan sa iyahang pamilya, nahimo sab aktibo si Rosalia sa ilahang komunidad. Gani, nahimo pa siyang usa ka parent leader, kung asa nakatabang sab siya sa mga kaubanang benepisyaryo pinaagi sa pagdumala kanila, ug paghatag sa sakto nga mga impormasyon kabahin sa programa ug uban pa nga oportunidad sa DSWD ug 4Ps. 

Sa pagkakaron, milampos na sa kolehiyo isa sa upat ka mga anak niya. Ug alang kanila nga pamilya, dako na kaayo kining kadaugan sa tanan nilang pagpaningkamot ug luyo sab sa mga gisinati nila nga kalisud. Timaan kini sa positibong epekto nga nadalit kanila sa Pantawid Pamilyang Pilipino Program o 4Ps.

Katumanan sa mga damgo, sama na lang sa pagpatapos sa ilahang mga anak sa kolehiyo, kini ang ginapasalamatan sa pamilya ni Rosalia sa DSWD ug sa programa. Tungod dako gayud ang ilahang pagtuo nga ang edukasyon mao ang magpabag-o sa pamuyo sa iyahang mga anak ug kini lamang ang pinakamaayong panulundon nga ilahang mabilin kanila.

Buhing timaan ang istorya ni Rosalia ug sa iyahang pamilya nga luyo sa mga pagsulay ug kalisud, sakto ug igong kugi inubanan sa tabang sa gobyerno sama sa 4Ps, posible gayud nga makab-ot ang kalambuan nga ginahandum sa matag Pamilyang Pilipino. Ubanan lang gayud kini sa paningkamot ug kalig-on aron mabaton ang kinabuhing madaugon.

#BawatBuhayMahalagaSaDSWD #DSWDSaOnse