Daghang kabag-uhan ang nahitabo sa kinabuhi ni Margarita Ricalde human sila nakaapil sa Pantawid Pamilyang Pilipino Program (4Ps).

Usa ka Barangay Health Worker si Margarita sa Barangay McKinley, Sulop, Davao del Sur, samtang ang iyang bana nga si Hilarion usa ka mag-uuma. Sa wala pa sila nahimong benepisyaryo sa 4Ps, si Hilarion ra ang gisaligan sa ilang pamilya sa adlaw-adlaw nga panginahanglan. Tungod sa kakulangon sa kita, dili sila makapalit og mga gamit sa eskwelahan para sa ilang tulo ka anak. Ang ilang kwarta igo ra para sa balon, ug tungod sa kalisod, napugos og baktas ang ilang mga anak padulong ug pauli sa eskwelahan.

Bisan pa og naningkamot og pagtipid si Margarita sa ilang kita gikan sa uma, lisod gihapon para nila ang sabay-sabay nga pagpaskwela sa ilang mga anak. Apan sukad sila nahimong benepisyaryo sa 4Ps, nakaangkon sila og kalampusan. Natabangan ang ilang mga anak sa pagpalit og gamit ug mga project sa eskwelahan, nadugangan ang ilang balon, ug naa na silay pangpamasahi sakay sa motor. Mas planado na sa pamilya Ricalde ang ilang adlaw-adlaw nga gastohan. Nakatabang usab ang mga Family Development Sessions sa pagdugang sa ilang kahibalo ug kabag-uhan sa ilang panginabuhi.

Sa tuig 2021, si Margarita usa sa mga benepisyaryo nga nakadawat og Livelihood Assistance Grant gikan sa Sustainable Livelihood Program, nga nagkantidad og ₱15,000. Kini nga pondo ilang gigamit isip dugang kapital sa ilang uma ug pagpabuhi og baboy.

Tungod sa programa, ang magulang nilang anak nakatapos og high school nga adunay academic award isip Salutatorian, samtang with honors usab ang duha pa ka anak.

Tungod sa dugang suporta gikan sa ubang ahensya sa gobyerno, nakadawat usab og scholarship programs ang ilang tulo ka anak, sama sa CHED-UniFAST ug DOST scholarships. Kini nga mga tabang maoy nakaalalay sa ilang paningkamot nga mapa-eskwela sa kolehiyo ang ilang mga anak hangtod sa ilang paggraduate. Duha sa tulo nila ka anak ang ni-graduate og Cum Laude, ug sa pagkakaron, tanan na sila mga propesyonal.

Ang ilang magulang anak usa na ka Licensed Professional Teacher, ang ikaduha kay kanhi DSWD Staff sa Kalahi-CIDSS Program, ug ang kinamanghuran usa na ka Office Staff sa pribadong kompanya.

Ang mensahe ni Margarita para sa mga pamilya nga nakaagi og kalisud ug kapobrehon: “Ayaw mo kawad-i og paglaum sa kinabuhi. Kanunay ta magpasalamat sa Ginoo sa Iyang giya ug panalangin. Mahimong positibo ang atong panan-aw sa kinabuhi kung atong saligan ang atong kaugalingon ug ang grasya sa Ginoo.”

Mao kini ang saysay sa kinabuhi sa Pamilya Ricalde—usa ka buhing pamatuod nga ang pagsalig sa kakayahan sa katawhan, sama sa gibuhat sa 4Ps, uban sa damgo ug paningkamot, mamahimo kining susi aron makalingkawas sa kalisud.

#BawatBuhayMahalagaSaDSWD #DSWDOnse #EODBMonth2025 #FromRedTapeToRedCarpet #BetterBusinessMovement #R2CBBMBP