“Simple ra kaayo among kinabuhi, maalala pa nako sauna nga naa ra ko sa balay ug naga-atiman sa among tulo ka anak. Ang akong bana usa ka nagtrabaho sa usa ka computer shop, ug ang income anaa lamang sa tres mil pesos (Php 3,000) kada bulan. Maglisud mi kung unsaon ipagkasya ang among kita sa pang adlaw-adlaw nga galastuhon”.
Mao ni ang gipaambit nga istorya ni Genalyn B. Serra, kuwarenta anyos ug lumulupyo sa Sitio Cogon, San Rafael, Cateel, Davao Oriental. Ang maong sugilanon istorya sa panahon nga dili pa sila benepisyaryo sa Pantawid Pamilyang Pilipino Program (4Ps) sa DSWD.
Dungag pa ni Genalyn, sa higayon nga sila nahimo na nag benepisyaryo sa maong programa, dako gayud ang natabang niini sa ilahang pamuyo. Apan, wala nila kini saligi. Kay bisan adunay cash grants, naningkamot gihapon sila nga magpamilya aron makalingkawas sa kalisud sa ilahang panginabuhi.
“Kung sauna kay maglisod mi na ipakasya ang among pangita sa among pang adlaw-adlaw, karon kay makaya na namo nga pa-eskwelahon sa college ang among mga anak. Sa among padayon nga pagpaningkamot, hinay-hinay namo nakab-ot ang among mga pangandoy para sa among pamilya.”
Nausab ang dagan sa pamuyo sa pamilya ni Genalyn, ug usa sa mga nahimong instrumento niini mao ang presensya sa programa sa 4Ps. Dili lang cash grants ug mga benepisyong pinansyal ang mihatud kanila sa maong kabag-ohan, kun dili ang pagpalig-on sa ilahang dedikasyon ug kakugi diha sa pagpaningkamot aron makaangkon sa kinabuhing hamugaway.
Paagi sab sa programa, miabri kanila ang ubang mga oportunidad sama sa pag-angkon nila og dungag kapital nga hatud sa Department of Trade and Industry kon DTI nga usa sa mga partners sa 4Ps. Usa sa mga butang nga mihatud kanila sa mga bastante nga panginabuhian. Ug karon, usa na sila sa mga pamilya nga mikab-ot sa Level 3 of well-being o Self-Sufficiency kung hain migradwar na sila sa programa.
“Dapat naa gyud moy tumong kung unsa ang gusto ninyo makab-ot sa kinabuhi. Ayaw ninyo limitahi ang inyong mga pangandoy. Dili lang magsalig sa hinabang o ayuda nga gikan sa gobyerno. Ipadayon lang ang pagpaningkamot hangtud sa makab-ot ang mga damgo,” mensahe ni Genalyn sa mga susama niya nga benepisyaryo sa 4Ps.
#BawatBuhayMahalagaSaDSWD #DSWDOnse
