Mihatag ang Department of Social Welfare and Development Field Office XI (DSWD FO XI), pinaagi sa Pantawid Pamilyang Pilipino Program (4Ps), og 3 ka tricycle ngadto sa 20 ka IP nga benepisyaryo sa Proyektong Pantawid Pasada kaniadtong February 5, 2025 sa San Vicente, Brgy. Gym, Panabo City. Ang Enhanced Support Services Intervention (ESSI) usa sa mga stratehiya sa programa nga nagahatag og dugang suporta sa mga panginahanglan sa mga benepisyaryo ug sa ilang komunidad.

Mipakita og hugot nga suporta ang OIC-Regional Director sa buhatan nga si Merlina A. Paragamac, diin girepresenta siya ni Davao del Norte 4Ps Provincial Link Shiela M. Dalipe. Kauban sab sa maong aktibidad ang City Tribal Office representative, Bae Merlyn. C. Rosell, City Social Welfare and Development Office (CSWDO) representative, Melchor O. Tolentino, ug mga representante sa BLGU San Vicente.

Mahinumduman nga nahimugso ang Pantawid Pasada Association sa Brgy. San Vicente sa Panabo City human kini nakaangkon sa una nga hugna sa pagpanghatag og livelihood sa mga miyembro niini paagi sa paghanyag kanila og mga pangpasada nga traysikel. Karon nadungagan na sab ang maong asosasyon og units nga nagkantidad og Php300,000.00. Makabenepisyo sa maong panginabuhian ang anaa sa baynte (20) ka mga miyembro sa maong asosasyon diin sila naggikan sa managlahing tribu sa lugar sama sa Mandaya, Mamanwa, Manobo, Sama, Dibabawon, Subanen, Mansaka, ug Ata Manobo. 

Segun pa sa presidente sa maong asosasyon nga si Love Joy A. Barcebal, dako og ikatampo sa kalambuan sa ilahang pamuyo ang maong panginabuhian. Dungag pa niya, “Kami mapasalamaton sa tulo ka tricycle nga among nadawat ug magpasalig nga among atimanon ug palambuon pa ang maong panginabuhian.”

Ang ESSI ang nagahanyag og supplementary interventions alang sa mga IPs, homeless families ug uban pa nga bulnerableng grupo aron masuportahan ang batakang panginahanglan nila paagi sa convergence o pag-alayon sa managlahing programa ug serbisyo diin ginasiguro ang maong mga benepisyaryo nga mahatud ang compliance nila sa mga kondisyon sa 4Ps. Hatud sab niini ang pagbayaw ug pagpalambo sa well-being sa benepisyaryo paagi sa hugot nga case management.

#BawatBuhayMahalagaSaDSWD