Gisugdan na ang Cash-for-Work (CFW) ubos sa 4Ps Enhanced Support Services Intervention (ESSI) project alang sa pag-ayo ug pagpanindot sa dalan paingon sa Palan Bagobo-Tagabawa National High School, Brgy. Binaton, Digos City niadtong Oktubre 6, 2023.

Gilangkuban ang maong ESSI-CFW nga kalihokan og 75 ka mga 4Ps Indigenous Peoples (IP) beneficiaries diin sulod sa onse (11) ka adlaw mokita sila og Php443 kada adlaw. Ang kinatibuk-ang proyekto nagahinan og Php365,475.00.

Ang maong proyekto gisuportahan sa DepEd nga gipanguluhan ni OIC-School Head Jave Endar ug miduyog sab si Tribal Chieftain Bai Baby Jerlina Owok.

Sa wala pa gisugdan ang maong proyekto, adunay oryentasyon nga gipadangat alang sa mga benepisyaryo ug nagpahigayon sab og ritwal ang tribu alang sa kinaiyahan tungod sa buhatong “pathway” diin mausab ang porma sa natudlo nga lugar.

Ang ESSI kon Enganced Support Services Intervention (ESSI) Guidelines sa Pantawid Pamilyang Pilipino Program nagtinguha nga masiguro nga ang Indigenous Peoples ug Homeless Families makaangkon sa mga gitakdang tumong sa programa luyo sa ilang kahuyang ug kawad-on.

Ang DSWD padayong nagpatuman og mga programa ug serbisyo alang sa pangkatawhang pagpanalipod sa mga kabus, bulnerable ug hinikawan. Lakip niani ang Kalahi-CIDSS, Sustainable Livelihood Program, Social Pension, Assistance to Individuals in Crisis Situations, Supplementary Feeding, ug uban pa.

#BawatBuhayMahalagaSaDSWD