DAVAO CITY (May 22, 2023) – Sunod-sunod nga pay out sa Assistance to Individuals in Crisis Situations kon AICS ang gipahigayon sa Department of Social Welfare and Development (DSWD) Region XI ngadto sa mga syudad ug munisipyo sa Davao De Oro ug Davao Del Norte gikan Mayo 21 hangtod Mayo 22, 2023.

Miabot sa 6,805 ka mga indibidwal nga mga lumulopyo sa mga munisipyo ug syudad sa probinsya sa Davao De Oro ug Davao Del Norte ang nakabenipisyo sa bag-uhay lang nga gipahitabo nga pay-out ilalom sa AICS sa DSWD Davao Region.

Gipangunahan ni DSWD Regional Director, Atty. Vanessa B. Goc-ong ang pagpang-apod-apod sa mga cash assistance nga mikabat sa P18,282,000 ngadto sa mga munisipyo sa Davao De Oro ug Davao Del Norte nga gitambungan usab ni Senator Imee Marcos ug mga lokal nga opisyales.

Sa probinsya sa Davao Del Norte, apil sa mga munisipyo kinsang mga residente ang nakadawat sa maong payout mao ang mga munisipyo sa Carmen, Asuncion ug ang mga syudad sa Tagum ug Panabo. Alang sa probinsya sa Davao De Oro, nakabenepisyo ang mga lumulopyo sa mga munisipyo sa Maco, Mabini ug Pantukan.

Anaa sa 3,500 ka mga indibidwal ang nakadawat sa maong cash assistance sa probinsya sa Davao Del Norte ug 2,578 usab ka mga indibidwal ang nakadawat gikan sa probinsya sa Davao de Oro.

Matod pa ni Pacita Sebio nga usa ka Senior Citizen, mapasalamaton gyud siya sa maong cash/food assistance nga nagkantidad og P3,000 kay aduna na siyay pangpalit og tambal alang sa iyang health problem.

Maagap at Mapagkalingang Serbisyo!